"वातावरणीय समस्याहरू समाधान गर्न रसियाको अनुभव" शीर्षकमा छलफल कार्यक्रम

03rd June,2022

जुन ३, २०२२ का दिन, विश्व वातावरण दिवसको अवसरमा, रुसी हाउसले कलेज अफ जर्नालिज्म एण्ड मास कम्युनिकेसन्स काठमाडौंका विद्यार्थी, शिक्षक र स्नातकहरूका लागि "वातावरणीय समस्याहरू समाधान गर्न रसियाको अनुभव" शीर्षकमा व्याख्यान-प्रस्तुति आयोजना गर्‍यो।

रुसी हाउसका कर्मचारी सुशील सिग्देलले रसिया र विश्वमा वातावरणीय समस्याका साथै तिनको समाधानका लागि रुसी महासंघको आधुनिक र प्रभावकारी दृष्टिकोणबारे जानकारी गराएका थिए । नेपालका लागि वातावरण र पर्यावरणका समस्याहरू सबैभन्दा सान्दर्भिक छन्, त्यसैले यस व्याख्यानले  उपस्थित सबै व्यक्तित्वहरुको सहजै ध्यानाकर्षण गराएको थियो। उनीहरु सबैलाई रूसी संघको वातावरणीय समस्या र तिनका समाधानका लागि चालिएका कानूनी, तथा अन्य कदमहरु व्यवहारिक र प्रशंशायोग्य लागेको थियो, जुन नेपालका सन्दर्भमा पनि लागु गरिने हो भने वातावरण र पर्यावरणसम्बन्धि थुप्रै समस्यालाई न्यूनीकरण र समाधान गर्न सकिने राय व्यक्त गरियो। उपस्थित व्यक्तित्वहरुलाई समस्याहरू समाधान गर्न रूसी संघले अपनाएका विधि र दृष्टिकोणहरूले जिवन्त छलफल गर्न अभिप्रेरित गरेको थियो।

कार्यक्रममा रुसी हाउसका निर्देशक श्री आन्तोन मास्लोभ, आरयुडीएन युनिभर्सिटीकि स्नातक र यस कलेजकि रेक्टर, प्राध्यापक मञ्जु मिश्र, कलेजका वरिष्ठ शिक्षक तपन्त शुक्ला , शिक्षक, विद्यार्थी, पूर्व विद्यार्थी तथा स्थानीय सञ्चारमाध्यमका प्रतिनिधिहरुको उपस्थिति रहेको थियो ।

सन्दर्भको लागि: काठमाडौंको कलेज अफ जर्नालिज्म एण्ड मास कम्युनिकेसन्स यस प्रकारको एक मात्र विशेष शैक्षिक संस्था हो जहाँ विद्यार्थीहरूले मिडिया, टेलिभिजन, फोटो, रेडियो पत्रकारिता, विज्ञापन र पीआरको क्षेत्रमा शिक्षा प्राप्त गर्छन्। स्मरण रहोस्, यस वर्षको अप्रिलमा मात्रै कलेजको मुख्य प्रवेशद्वारमा रुसी प्राच्यविद्, इन्डोलोजिस्ट, रुसी इन्डोलोजिकल स्कूलका संस्थापक आइ. पि. मिनायेभको ब्युस्ट स्थापित गरिएको थियो।